Novas

Culturgal 2020 retransmite a creación cultural galega da pandemia

29 Novembro 2020

O sábado 28 de novembro na Culturgal comezou a programación retransmitida desde Pontevedra en aberto para todo o público. A organización do evento habilitou 3 canles na súa páxina web a través das que transmite a programación dos espazos Libro (Teatro Principal de Pontevedra), Foro (Sala Exposicións do Pazo da Cultura) e Escena (Auditorio do Pazo). Susana Seivane, Luar na Lubre, Manuel Rivas, Elba Pedrosa, Ledicia Costas, Marta Pérez de Inversa Teatro ou as cooperativas culturais nutriron o programa da Culturgal 2020 con público presencial e online. A retransmisión de Culturgal permitiu achegar a programación a centos de persoas durante a xornada do sábado; o número de reproducións nas canles do evento chegou a catro mil. 


No Foro da Culturgal o sábado foron protagonistas, por unha banda, as institucións que como Deputación de Pontevedra e Xunta de Galicia presentaron as súas liñas de traballo no ámbito da cultura. Carmela Silva, presidenta da Deputación de Pontevedra, fixo balance do proxecto Re-Acción Cultural posto en marcha a consecuencia da pandemia para a apoiar o sector cultural da provincia. Pola tarde, foi Anxo Lorenzo, secretario xeral de Cultura da Xunta, quen esbozou as claves das políticas dixitais e das estratexias culturais para o ano 2021. "Temos unha cantidade moi alta de iniciativas que se realizan ao longo do ano que ven, que buscan a máxima participación social, achegarse a todos os públicos de Galicia”, reseñou Lorenzo en defensa da transmisión dixital de contidos. 


Por outra parte, o espazo Foro situado na sala de exposicións do Pazo da Cultura de Pontevedra rebordou arte contemporánea e perfomances como a de Monica Mura e Maria Roca, xordidas ao redor da distancia física imposta pola pandemia e da violencia machista respectivamente durante a mañá. En relación ao mundo do libro, o sábado 28 Culturgal recibiu as visitas de Ledicia Costas, Manuel Rivas, Antón Lopo, Eva Mejuto, Anxos Sumai, Marilar Aleixandre e Rosalia Fernández Rial, entre outros. Os encontros literarios teñen lugar este ano no Teatro Principal de Pontevedra.

No balcón da Susana Seivane, a cultura é boa e segura

Durante a tarde pasáronse dúas das películas do ano en Galicia: Arima de Jaione Camborda e A illa das mentiras, de Paula Cons. En ambos casos o público asistente tivo oportunidade de conversas coas directoras sobre os procesos de rodaxe e distribución de filmes nun ano marcado pola COVID19. Tamén na quenda da tarde as cooperativas culturais protagonizaron “A hora da Economía Social na Culturgal” con demostracións ao vivo do seu traballo por parte das seguintes entidades: Cestola, Culturactiva, Urdime, Miudiño, DezdeDez e Charlatana. 


Susana Seivane e Luar na Lubre foron os pratos fortes da xornada no escenario musical de Culturgal 2020 baixo a etiqueta Fondo de Proxectos Culturais Xacobeo 2021. A gaiteira tocou desde un balcón improvisado no Auditorio do Pazo, desde o que proclamou que a cultura é boa e segura. Foron vinte minutos dos seus concertos de desconfinamento, que iniciou durante a corentena para animar aos seus veciños. Pecharon o escenario de concertos ao vivo do sábado Luar na Lubre, co seu espectáculo Vieiras e vieiros, historias de peregrinos, un album no que visualiza a pegada artística., cultural e natural do Camiño de Santiago. 

Culturgal 2020 presenta en Pontevedra a súa edición 13 retransmitida

20 Novembro 2020

Darlle volta á tortilla. Facer do defecto, virtude.  Ou ao mal tempo, boa cara. A filosofía da Culturgal 2020, do 27 ao 29 de novembro, é manter o obxectivo de mostrar ao gran público a actividade cultural de Galicia máis remarcable do presente ano e do que ven. Desde Pontevedra, tres canles para retransmitir o que acontece no escenario(Escena, Foro, Libro) e, tamén fóra del, e un equipo de realización que suma vinte persoas ao staff da Culturgal. Chegar ás casas durante a última fin de semana de novembro é a meta que se propón o evento nesta edición da pandemia. Agás a sala de cinema, toda a programación será accesible desde a casa  en cultur.gal. De calquera xeito, para participar presencialmente nalgunha das actividades e tendo en conta os aforos permitidos, pódese retirar o teu convite en cultur.gal até completar capacidade desde o venres 20 de novembro. En caso de emerxencia, cultura.
A 13ª edición da Culturgal avanzou hoxe venres 20 a súa programación, xa dispoñible en cultur.gal, protagonizado polas grandes estreas do ano e os nomes de referencia da literatura, música, arte contemporánea, cinema e artes escénicas. Só o Espazo Cinema sera exclusivamente presencial xa que a programación dos outros tres escenarios: Foro (Sala de Exposicións do Pazo da Cultura de Pontevedra), Escena (Auditorio do Pazo da Cultura) e Libro (Teatro Principal Pontevedra), será transmitida a través de tres canles na web cultur.gal. O sábado 28 e o domingo 29 de novembro, máis de 70 propostas culturais de música ao vivo, teatro, libros, arte, ciencia e espectáculos para toda a familia, 12 cámaras, 20 horas de retransmisión e un equipo de máis de 60 persoas traballando para levar ás casas o mellor da cultura galega.
Victor López, presidente da Culturgal, e Xosé Aldea, director, estiveron acompañados por Jacobo Sutil, director da Agadic da Xunta de Galicia, Carme Fouces, concelleira de Cultura de Pontevedra, e Carmela Silva, presidenta da Deputación de Pontevedra. Desde Culturgal agradeceuse inmesamente aos patrocinadores o seu apoio e implicación nunha Culturgal na que tamén mostrarán as súas principais liñas de traballo. Para o director da Agadic, Culturgal tiña que celebrarse “si ou si, é un punto de inflexión para a cultura no ano en curso e no próximo” . A Xunta de Galicia presenta diferentes actividades dentro da Culturgal ao redor dos programas en marcha e os que se desenvolverán en 2021, ano de celebración do Xacobe. A concelleira de Cultura de Pontevedra quixo subliñar a teima da organización da Culturgal por celebrar esta edición malia as dificultades. “É bo saber que non hai pandemia que poda coa Culturgal”. Pola súa parte, Carmela Silva explicou que os eixos da programación da Deputación de Pontevedra na Culturgal son igualdade e memoria e pediulle á organización que “non esquezamos que a xente está triste, Culturgal tamén ten que ter como obxectivo facernos felices”.
4 escenarios, 3 canles, referentes culturais no programa
A través da web cultur.gal e das canles de youtube, o pùblico poderá escoller entre os contidos da Canle Libro, a Canle Foro ou a Canle Escena. Na primeira, Manuel Rivas, Ledicia Costas, Berta Dávila, Antón Patiño, Miguelanxo Prado, Alberto Vázquez, Kiko da Silva, Suso de Toro e moitas máis. A xornalista Esther Estévez, presentadora do espazo Dígocho Eu da TVG, condúcenos por escenario en 2020, retransmitido online desde o Teatro Principal de Pontevedra. Novidades e xéneros, conversas, os premios do ano, e, por suposto, propostas temáticas ao redor das grandes cuestións derivadas da pandemia que preocupan a creadores, empresas, institucións e sociedade, en xeral. Desde a Sala de Exposicións do Pazo da Cultura de Pontevedra, o Espazo Foro acolle performance, poesía ou  artes escénicas. Tamén encontros ao redor do galego no ensino, na xustiza ou na televisión. Incluso tempo de ópera e breakdance. O Foro da Culturgal 2020 convértese nun espazo de representación, reflexión e encontros ao redor da creación artística e dos xeitos de traballar e incidir na cultura galega que ven, nun contexto marcado pola COVID-19. Mónica Mura, o CDG, Carlos Varela, Rosalía Fernández Rial, Marta Pérez, Antón Reixa, Aldaolado, Ana Romaní, Vella Escola e moito máis no Foro Culturgal 2020, unha canle conducida pola actriz Iria Sobrado.
Na Culturgal 2020, a Escena, con transmisión ao vivo desde o Auditorio do Pazo da Cultura de Pontevedra, é ben variada pensando en músicas para toda a familia: desde o espírito punk até o ritmo de big band pasando polo jazz e os nomes máis coñecidos do folk como Luar na Lubre ou Susana Seivane cos seus respectivos espectáculos do Fondo de Proxectos Culturais Xacobeo 2021, sen esquecer os espectáculos para a cativada e as súas familias. Dous días de música ao vivo, sábado 28 e domingo 29 de novembro, que chegarán a casa na busca da excelencia,  cun son e realización envolvente. A actriz Diana Sieira será a encargada de ir presentándoo. 
A sala de cinema, a única exclusivamente presencialSe en todos os espazos Culturgal, ademais da transmisión online hai cabida para o aforo máximo de público permitido polas medidas sanitarias, no caso do Cinema a participación do público será só e exclusivamente presencial. Títulos de luxo do cinema galego na programación 2020. Catro longametraxes de ficción e dous documentais proxectaranse no Pazo da Cultura de Pontevedra coa presenza de directoras, produtoras e reparto. O pase de Ons, de Alfonso Zarauza, con concerto da banda Chicharrón, será evento especial da xornada de apertura da Culturgal, o venres 27 de novembro. A illa das mentiras, de Paula Cons,  Arima, de Jaione Camborda, Longa noite, de Eloy Enciso, e os documentais Dorothé na vila, de Alejandro Gándara e Olaia Tubío e A media voz, Heidi Hassan e Patricia Pérez Fernández, forman parte da proposta cinéfila da Culturgal coordinada por AGAPI. 
Alianzas e complicidades Nun ano coma este, a décimo terceira edición da Culturgal é o resultado da colaboración e alianzas, ademais de coas institucións públicas e o seu apoio fundamental, senón tamén coas diferentes empresas que están a sumar talentos para  facer deste un evento de referencia.  Culturgal 2020, co lema “En caso de emerxencia, cultura” está organizada pola asociación do mesmo nome, presidida por Victor López, e da que forman parte AGE (Asociación Galega de Editoras), AGEM (Asociación Galega de Empresas Musicais), Eganet (Empresas Galegas Adicadas á Internet), AGAPI (Asociación Galega de Produtoras Independentes) e Escena Galega. A conversa continuada nos últimos meses coas institucións patrocinadoras da Feira é fundamental nesta edición marcada pola COVID19. A Xunta de Galicia, a través de Agadic, sera un ano máis patrocinadora do evento, que conta ademais co apoio fundamental do concello de Pontevedra, da Deputación de Pontevedra e do Ministerio de Cultura e Deporte.